Gazeta prestigjoze britanike “Express”, në një artikull të sajin me autor gazetarin Matt Drake, shkruan se është bllokuar oferta e BE për të nisur negociatat me Shqipërinë.
Gazeta, e njohur për qëndrimet e saj kritike ndaj BE-së, shkruan ndër të tjera se, shtetet anëtare të Unionit po pengojnë bisedimet e pranimit të Shqipërisë, ndërsa sulmojnë korrupsionin dhe prodhimin e kanabisit në vendin ballkanik.
Gazetari shkruan se: “Në qershor, Komisioni Europian rekomandoi çeljen e negociatave për Shqipërinë që të bashkohet me bllokun”.
“Por vendet e BE, veçanërisht Franca, po tentojnë që të bllokojnë ofertën për anëtarësim. Parisi e justifikon kundërshtimin ndaj Shqipërisë për shkak të problemeve të vendit ballkanik me korrupsionin dhe krimin e organizuar”, shton ai.
Gazetari citon “Financial Times”, e cila në vitin 2017 do të shprehej se, asnjë vend europian nuk ka kultivuar më shumë kanabis se Shqipëria.
“Ka dyshime për kursin e reformave të qeverisë shqiptare. Nuk janë vetëm vendet europiane, por edhe Shqipëria vetë. Vendi ka një nivel ekstremisht të lartë pakënaqësie dhe qindra-mijëra janë larguar nga vendi vitet e fundit”, shkruhet në artikull.