Home Aktualitet Votat e emigrantëve, ja çfarë thotë Lulzim Basha

Votat e emigrantëve, ja çfarë thotë Lulzim Basha

nga Albina Hoxhaj

Kreu i opozitës flet për votën e emigrantëve, nevojën për reformë të re administrative, qëndrimin e Presidentit për 30 Qershorin, si dhe për reformën në drejtësi dhe mbështetjen e SPAK.

Nisida Tufa: Kërkuat nga strukturat te përgatiten për zgjedhje dhe u lexua si nje sinjal që po shkohej drejt zgjidhjes së krizës politike dhe këtu lind pyetja; A kishte diçka konkrete? Une dua t’ju pyes sepse përgjatë kësaj interviste që po zhvillojmë bashkë keni artikuluar 3 herë, zgjedhje parlamentare dhe lokale te parakohshme në të njëjtën ditë. Mendoni se ështe e realizueshme kjo z.Basha kur kryeministri Rama flet për zgjedhje vetëm në 2021-shin?

Lulzim Basha: Vendi është në krizë të thellë dhe kriza ka nevojë per zgjidhje. Po të jetë për Edi Ramën, mund të mos bëjë zgjidhje edhe deri në 2121-shin. Por nuk është as dëshira dhe as mungesa e vullnetit të Edi Ramës ajo që do te diktojë daljen e Shqipërisë nga kriza. Daljen e Shqipërisë nga kriza do ta diktojë vullneti i përbashkët i shumicës dërrmuese te shqiptarëve dhe i mbështetësve tanë, i partnerëve ndërkombëtarë, të cilët para një jave, te zezë mbi të bardhë konstatuan në mënyrë institucionale që Shqipëria është në krizë të thellë politike. Deri më sot mënyrë tjetër për të dalë nga kriza e thellë politike përveç zgjedhjeve të parakohshme nuk ka. 

Nisida Tufa: I shihni të realizueshme pranverën e vitit tjetër? 

Lulzim Basha: Ne insistojmë që këto zgjedhje t’i mbajmë një orë e më parë, sigurisht me garanci për qytetarët shqiptarë dhe ajo që kërkojmë nuk është për ne, është për qytetarët shqiptarë, garanci për votuesit shqiptarë. Ky është objektivi ynë dhe për këë luftojmë dhe mendoj se me 9 kushtet e Bundestagut që tashmë përbëjnë një udhërrëfyes jo vetëm për Shqipërinë por edhe për Këshillin Europian, jemi një hap më afër realizimit të një synimi fisnik, sepse nuk ka asgjë të keqe për një demokraci të bëjë zgjedhje të parakohshme, problemet me demokracinë nisin kur nuk ka zgjedhje ose kur ka zgjedhje te manipuluara apo të diktuara nga forca të errëta, siçështë krimi i organizuar apo oligarkia. 

Nisida Tufa: Gjthmonë thoni z.Basha, pas çdo takimi që zhvilloni me ndërkombëtarët se nuk i komentoni takimet me ta. Por unë ju pyes, a ka sot një tentativë nga ndërkombëtarët për të zgjidhur krizën?

Lulzim Basha: Mendoj se është në dritën e diellit një konsensus i faktorit ndërkombëtar euroatlantik, perëndimor që në Shqipëri ka një krizë të thellë, që kjo krizë duhet zgjidhur dhe se një nga burimet kryesore te krizës janë zgjedhjet. Prandaj ka ardhur theksi tek Reforma Zgjedhore që përbëhet jo thjesht nga ndryshime ligjore por ka vullneti politik për të zbatuar çfarëdo ligji që nga Kodi Elektoral, tek Kodi Penal, tek ligji i dekriminalizimit e kudo tjetër. Prandaj nuk mendoj se po nxjerrim ndonjë secret, sepse sekreti është shkruajtur e zezë mbi të bardhë në nëntë kushtet e Bundestag-ut, që Shqipëria të avancojë drejt Bashkimit Europian, që Shqipërisë t’i hapen negociatat duhet të zgjidhë krizën politike përmes zgjedhjeve te lira dhe të ndershme pas një Reforme Zgjedhore me përfshirjen dhe konsensusin e të gjithë partive politike. 

Nisida Tufa: Një pyetje pas gjithçkaje që ka ndodhur, pas 30 qershorit, por edhe përpara tij, nëse do të ktheheshit pas në kohe, a do ta ndermerrnit përsëri vendimin e djegies së mandateve?

Lulzim Basha: Djegia e mandateve ishte një veprim i detyruar nga abuzimi total i qeverisë, i Edi Ramës, i cili ishte në kushtet e kapjes së të gjitha pushteteve. Është e lehtë të gjykosh post-factum, por dua ta kuptojmë se as vetëdijesimi i faktorit ndërkombëtar për krizën e thellë politike në vend dhe as vetëbesimi i qytetarëve se kjo krizë mund të zgjidhej, se zgjedha e krimit dhe e korrupsionit nuk do të ishte nje konstante e jetës se tyre të perditshme, nuk do të vinte pa një aksion të fuqishëm opozitar. Duhet të kuptojmë se ne kemi zgjedhur një metodë të papreçedentë, por situata ku ka qenë vendi, ka qene e parpreçedentë, ndaj në retrospektivë, duke parë tashmë se kriza politike në Shqipëri është shtruar për zgjidhje si një domosdoshmëri edhe nga faktori ndërkombëtar, gjykoj se vendimi i opozitës së bashkuar për të ndërmarrë këtë hap të pareçendentë, ishte i justifikuar. Natyrisht nuk është një veprim i cili mund të ndërmerret lehtë apo mund të pranohet lehtë në kushte të tjera. Por mos harroni se kjo ndodhi në kushtet kur opozita nuk kishte asnjë instrument për të ndalur abuzimin me pushtetin, kur vendi ishte pa Gjykatë Kushtetuese, kur Prokurori i Përgjithshëm u emërua në mënyrë antikushtetuese, kur zgjedhjet u vodhën për herë të dytë dhe të tretë, kur personat që u kapën duke vjedhur zgjedhjet jo vetëm nuk u dënuan, por u promovuan, pra, kur nuk kishte absolutisht asnjë rrugëdalje institucionale nga kriza. Dhe në këto kushte, edhe kur u mbyll çdo rrugëdalje institucionale nga kriza, cila mund të ishte një rrugedalje? Të ndëshkoheshin autorët e 339 dhe 184. Të shkonin perpara drejtësisë dhe të merrnin dënimin, atë që kërkon sot Bundestagu, por nuk ndodhi. Nuk kishte si të ndodhte, edhe sot nuk ndodh megjithëse është kërkuar e zezë mbi të bardhë, nuk ka asnjë veprim te Prokurorisë për të arrestuar siç kërkon Bundestagu. Është hera e parë që në Parlament kërkon arrestime dhe për tëçuar përpara drejtësisë ata që vodhën zgjedhjet e shqiptarëve. Edhe kur nuk kishte asnjërrugëzgjidhje institucionale, as Gjykatë Kushtetuese, se në fund të fundit nje opozitë mund të kundërshtojë një ligj të padrejtë, antikushtetues, dhe të tilla kjo mazhorancë kaloi shumë, i mbani mend, Ligji për dividentin, këtej shtonte taksat për shqiptarët e varfër, shtonte çmimin e energjisë, naftës, dhjetëra kryefamiljarë humbën jetën në paraburgime, sepse nuk paguanin dot faturat, këtej u ktheu milionat oligarkëve, 4 – 5 oligarkëve qe kontrollojnë të gjithë aktivitetin ekonomik ne Shqipëri. Këtej shkonin në burg dhe vrisnin veten për një cigare hashash, ndërsa nga ana tjetër bandat e trafikut të drogës, bandat e kokainës nuk arrestoheshin, apo në raste kur detyroheshin t’i arrestonin për shkak të presionit ndërkombëtar, liroheshin dhe sot bandën e Xibrakës e ke në liri. Është kjo pabarazi e tmerrshme ligjore. Në këto kushte e bëmë nje përpjekje të fundit, të cilën për fat të mirë ka regjistruar edhe Raporti i OSBE/ODHIR, e çuam ligjin për vettingun e politikanëve. Ne hartuam një ligj si nje përpjekje të fundit për ta zgjidhur krizën në mënyrë institucionale. Katër vjet përpara se të benim këtë ne çuam ligjin për dekriminalizimin, i cili dha disa rezultate. Por jo të mjaftueshme, sepse natyra e marredhënieve të kupolës te PS me krimin ndryshoi. Në vend që të shkëputej nga krimi, ndryshoi. Prandaj propozuam ligjin për vetingun e politikanëve. Komisioni i Venecias gjykoi që në kushtet ku ndodhej Shqipëria ky ligj i duhej Shqipërisë, por në seancën e fundit të vitit të kaluar mazhoranca e hodhi poshtë kete ligj dhe OSBE/ODHIR e thotë qartë që ishte pas këtij vendimi qe opozita u detyrua të merrte vendimin e papreçedentë për djegien e mandateve. Çfarë dua të them me këtë? Opozita ka vepruar me përgjegjësi dhe përgjegjshmëri shumë te lartë. Është përpjekur të shterojëçdo mundësi institucionale për ta zgjidhur krizën. Ne e dimë që Edi Rama i vodhi zgjedhjet e 2017-ës, që e shkeli me këmbë marrëveshjen politike te 17 Majit dhe që, në fakt, vetë marrëveshja siç u kuptua më vonë, ishte bërë pasi Edi Rama kishte blerë shumicën e votave me bandat e krimit të organizuar. Megjthatë ne nuk nxituam të dilnim nga Parlamenti, por kërkuam hetimin e shitblerjes se votës, nuk ndodhi. Përkundrazi, sapo nisën hapat e parë të hetimit, sapo nisi proçesi kundër Sajmir Tahirit qëështë një nga autorët kryesorë të blerjes së votave në Tiranë, u morën masat për të emëruar një kryeprokurore kukull të regjimit, pastaj një kryeprokurore tjetër të Krimeve të Rënda kukull të regjimit. Dëshmitarët u kercënuan, u arrestuan, u detyruan të shkojnë në azil, siçështë rasti i Dritan Zaganit, apo u esktraduan në mënyrë të paligjshme siç ishte rasti i financierit te bandës së Habilajve. Ishim në kushtet kur nuk kishte më asnjë rrugëdalje institucionale. Ishin këto kushte ku pasi u rrëzua edhe propozimi yne për ligjin për vetingun e politikanëve ne u deryruam të hedhim këtë hap të papreçedentë. Sot mund te themi se kemi vetëdijësim jo vetëm të shqiptarëve, por edhe të faktorit ndërkombëtar për të gjithë dimensionin e krizës, 9 kushtet e Budnestagut e provojnë këtë. 9 kushtet e Bundestag-ut janë udhërrëfyes jo vetëm për të hapur negociatat, por edhe për të dalë nga kriza politike. 3 janë hapat kryesorë në këtë drejtim, garantimi i zgjedhjeve të lira dhe ge ndershme përmes nje Reforme Zgjedhore gjithëperfshirëse me vullnet politik për ta zbatuar, ndëshkimi i atyre që kanë shkatërruar zgjedhjet e mëparshme dhe zgjedhje të lira dhe të ndershme. 

Nisida Tufa: Aleatët dhe partite e vogla kërkojnë ndryshimin e sistemit zgjedhor. Çfarë pozicioni ka Partia Demokratike lidhur me këtë? Asnjëherë nuk artikulohet qartë, të shtrohet pozicioni i PD për ndryshimin e sistemit zgjedhor. 

Lulzim Basha: Nuk është e vërtetë, une kam shprehur qartë qëndrimet e mia për këtë. Unë besoj se sistemi se si shqiptarët zgjedhin pushtetin qëndror dhe pushtetin vendor ka vend për përmirësime të dukshme. Personalisht besoj se në këtë fazë të demokracisë shqiptare kemi nevojë për një dhomë të dytë, për nje senat, një reduktim te numrit te deputetëve në dhomën deputetëve dhe një një senat, i cili të luajë rolin e nje hapi tjetër kontrolli dhe balance pushteti. Për të kufizuar pushtetin e ekzekutivit, për të kufizuar cirkun e shëmtuar që shpesh shohim në Parlament, ku legjislacioni kalon brenda natës për të favorizuar faktorë ekonomikë, oligarkë apo edhe banda kriminale me aministi. Unë besoj se qytetarët kanë te drejtë të zgjedhin drejtpërdrejt përfaqësuesit e tyre, personalisht kam parashtruar disa herë idenë e një sistemi maxhoritar, qoftë edhe një sistemi kombëtar proporcional. Po kështu besoj se pushteti vendor ka rënë viktimë e një reforme pseudo– reforme, e cila nuk kishte për qëllim përmirësimin dhe shërbimin ndaj qytetarëve, por përqëndrimin e pushtetit në duart e partisë në pushtet dhe unë besoj se ka ardhur koha t’i rikthehemi reformës administrative por mbi të gjitha ligjit për decentralizimin, për t’i çuar më shumë pushtet dhe kompetenca bashkive qe t’i shërbejnë më mirë qytetarëve. Une jam i hapur për të gjitha këto, por mbi te gjitha dua te theksoj dy gjëra; e para, çfarëdo sistemi të zgjedhim, ne, pa zgjidhur problemin e kapjes se politikës nga krimi, pa e ndarë shtetin nga krimi, pa e ndarë shtetin nga partia në pushtet, çdo sistem që të zgjedhim do të nxjerrë në të njëjtin përfundim. Kishim maxhoritar me korreksion proporcional erdhëm tek proporcionali rajonal, por problemi i kriminalitetit erdhi duke u shtuar, ndonëse një nga argumentet kryesore për të ndryshuar sistemin ishte për të kufizuar futjen e personave me preçedentë penalë në Kuvend, që do të thotë se nuk është sistemi as shkaku dhe as zgjidhja. Shkaku është bashkëpunimi i politikës me krimin zgjidhja është ndarja e politikës nga krimi. Kemi hedhur një hap të rëndëishëm qëështe ligji per dekriminalizimin, kemi disa hapa të tjerë për të hedhur që janë fare qartë të pershkruara në 9 kushtet e Bundestagut dhe çfarëdo proçesi për rregullat e lojës, për Kodin Zgjedhor, për Kodin Penal, për vetingun e politikanëve, për lirinë e medias, ligji për mediat audiovizuale, për financimin e partive politike, për demokracinë brenda partive politike, nuk mund të jetë produkt i dhomave të errëta. Proçesi ka shumë rëndësi. Duhet të jete transparent, gjithpërfshirës, kam parasysh jo vetëm partite politike të opozitës, por të gjithë faktorët shoqërorë. Demokracia i takon çdo qyetari i takon edhe punëdhenësit, edhe punëmarrësit, edhe pensionistit edhe studentit, edhe vogëlushit që nuk ka akoma te drejtën e votës, por cilësia e arsimit që ka që nga kopshti deri në klasën e 9 apo deri në fund të shkollës së mesme, përcaktohet nga vendimet që marrin institucionet e zgjedhura me votë nga prindërit e tyre. Prandaj, duhet të jetë një proces i hapur, transparent publik. Unë besoj fuqimisht, se përtej vendimarrjes me zgjedhj, ku zgjidhet parlamenti, ku zgjidhen bashkitë, qytetarëve duhet t’u jepet mundësia reale, jo teorike, por relae për referendume kombëtare dhe referendume lokale për çështje që kanë të bëjnë me interesat e drejtpërdrejta të komunitetit.

Pyetje: Po për votën e emigrantëve jeni z.Basha?

Lulzim Basha: Absolutisht Partia Demokratike prej fillimit ka iniciuar idenë e votës së emigrantëve dhe në këtë kuptim e kemi mbështetur dhe e mbështesim fuqimisht. Por duhet të kuptoni se mënyra se si qeveria është mënyrë tipike bandite. Në momentin që ne kërkuam votimin elektronik si një mundësi për të kufizuar marrjen e kartave të identitetit, me shenja të caktuara që vendosen, i pamë edhe nga përgjimet e Dibrës për të evidentuar familjarë, këta vendosën votimin e emigrantëve, por pa garantuar që të paktën vota e shqiptarëve në Shqipëri do të garantohej me një sistem të tillë që të pamundësonte shitlerjen e votës, dhe që mund të përdorej në të njëjtën mënyrë pastaj edhe për votimin e emigrantëve. Pra, në këtë kuptim kemi të bëjmë me një propagandë të pastër të qeverisë me votën e emigrantëve. Partia Demokratike dhe unë personalisht besojmë se emigrantët duhet të kenë të drejtën që të marrin pjesë në vendime të rëndësishme, siç është zgjedhja e parlamentit të Shqipërisë.

Pyetje:I pëlqen apo jo Partisë Demokratike, opozitës, në Parlament ka tashmë një realitet të ri politikë me deputetët e opozitës së re. A keni ndërmend ju si Parti Demokratike, si opozitë të vendosni ura kontakti me fillimin e një rikthimi në sistem?

Lulzim Basha: Ura kontakti me kë?

Pyetje: Me opozitën parlamentare.

Lulzim Basha:Nuk ka opozitë parlamentare. Ka vetëm një opozitë politike e cila është opozita e Partisë Demokratike dhe aleatëve tanë, që faktikisht me statistikat e 2017-ës, me statistikat e 2015-ës është sot shumicë në vend, ndërsa sipas gjithë studimeve të opinionit, matjes së opinionit është një shumicë e thellë në vend nëse do të kemi një proces të lirë dhe të ndershëm zgjedhor. Ky është një realitet që nuk mund ta fshehë, as nuk mund ta maskojë askush.

Pyetje: Partia Demokratike është pothuajse jashtë sistemit lokal. A keni ju z. Basha një mesazh për përfaqësuesit e Partisë Demokratike që nuk janë më të përfaqësuar as në pushtet lokal dhe as në pushtet qendror?

Lulzim Basha: Pushteti lokal ka falimentuar, është kapur me dhunë nga një qeveri që di vetëm të përqëndrojë pushtet dhe ta përdorë atë për pasurinë dhe për tekat, qejfet, tarafet e kryepushtetarit dhe ortakëve të tij. Ndaj objektivi dhe emergjenca kryesore ndaj pushtetit vendor është mbajtja sa më parë e zgjedhjeve vendore kushtetuese, të cilat, në pikëpamjen time duhet të paraprihen nga një  rishikim i reformës territoriale dhe një thellim i decentralizimi,t në mënyrë që pushteti vendor me të vërtetë t’u takojë qytetarëve dhe jo kryeministrit apo grupeve kriminale siç është rasti sot dhe siç ka qenë për fat të keq në shumicën e bashkive edhe në 4 vitet që kaluam. Kemi parë që cilësia e shërbimit ka rënë, investimet publike kanë rënë, taksat janë rritur, është rritur numri i punësuarve nëpër bashki. Pra, nuk është arritur asnjë prej qëllimeve të shpallura të ashtuquajturës reformë territoriale por ka dështuar pothuajse në të gjithë parametrat duke bërë që qytetet tona dhe fshatrat tona të kenë më pak ujë të pijshëm, të kenë më shumë plehra, të kenë më pak investime në rrugë, të kenë më pak qendra shëndetësore, të kenë më pak kujdes dhe të kenë shumë më tepër prani të zgjedhurve direkt të qytetarëve dhe shumë më shumë propagandë dhe përkeqësim të cilësisë së jetës.

Pyetje: Dua t’ju pyes pak edhe për presidentin, z.Meta, lidhur me opinionin e Komisionit të Venecias është komentuar se presidenti nuk mund të shkarkohet. Nga ana tjetër maxhoranca thotë se janë legjitimuar zgjedhjet e 30 qershorit. Ju si e shihni këtë raport z.Basha?

Lulzim Basha: Është e qartë se zgjedhjet e 30 qershorit, votimet e 30 qershorit kanë rënë. OSBE/ODIHR –i është trupa përgjegjëse për gjykime të çdo procesi zgjedhor apo kuazi zgjedhor siç ishte ai i 30 qershorit. Që kanë rënë këtë e kupton çdo shqiptar; janë bërë pa konkurrencë, janë bërë pa dekret presidencial dhe edhe pse pa konkurrencë janë masakruar në çdo hap që nga përgatitja, tek pseudofushata, tek dita e votimit, tek numërimi apo masakra me numërimin e votave, gjithçka ishte një proces farsë. Pra, 30 qershori është një proces i rënë moralisht, politikisht, është i rënë nga ana kushtetuese. Ndërsa sa i përket rolit të presidentit, shqetësimi i presidentit prej fillimit ka qenë zgjidhja e krizës. Natyrisht, ne nuk mund të biem dakord me shumë prej pikëpamjeve të presidentit për sa i përket ngjarjeve dhe si janë zhvilluar këto ngjarje. Por nuk mund të mohoj për asnjë çast se shqetësimi i tij kryesor të shmangte atë që po projektonte Edi Rama dhe bandat e interesuara në gjendje politike konflikti që ishte konflikti civil me pasoja të rënda për vendin.Dhe këtu besoj se jo vetëm opozita dhe qytetarët, por edhe historia do ta vlerësojë vendimin e presidentit për të shmangur këto skenarë potencialisht gjakderdhje dhe vëllavrasje me njerëz që ishin të gatshëm që për hir të pushtetit të çonin në konfrontim me pasojë humbjen e jetës së dhjetëra, qindra qytetarëve. Jam i lumtur që si kryetar i opozitës kam marrë vendimin e duhur bashkë me popullin për të mos shkuar, për të mos rënë pre e këtij skenari dhune të përgatitur nga të njëjtat banda kriminale që përgatitën dhe ekzekutuan vjedhjen e zgjedhjeve të 2017-ës apo masakrën elektorale të Dibrës. Dhe falë këtij qëndrimi sot kemi ndërgjegjësim të faktorit ndërkombëtar që për zgjidhjen e krizës shqiptare kemi dy realitete përballë njëri tjetrit; një qeveri të kapur disa herë duke vjedhur zgjedhjet me krimin e organizuar, duke bashkëpunuar me kriminelët, që nuk ndahet dot nga Dakot dhe nga Doshët, e nga Avdylajt, e një opozitë që ka qëndruar fuqimisht për parimet, vlerat, standardet europiane: Zgjedhje të lira dhe të ndershme, shtet të së drejtës, që do të thotë barazi e qytetarëve para ligjit nga presidenti, kryeministri, te ministrat e tek qytetari më i thjeshtë dhe garantimin e lirive dhe të drejtave themelore të njeriut që janë baza, janë themelet e një shoqërie të përparuar europiane. Nga ato shoqëri që unë kam patur fatin t’i njoh në rininë time, ku shqiptarët shpeshherë shkojnë edhe pa e ditur gjuhën por ja dalin të ndërtojnë jetën e tyre, të ndërtojnë jetën e fëmijëve të tyre, të shkëlqejnë, të bëhen shkencëtarë, artistë, këngëtarë. Pra, që provon se në qoftë se ne ndërtojmë këtë realitet në vendin tonë asgjë nuk na pengon ta lëmë pas këtë kohë të hidhur për Shqipërinë dhe ti japim këtij vendi të bukur dhe të bekuar nga Zoti të ardhmen europiane që meriton për veten e tij dhe për fëmijët shqiptarë.

Pyetje: Z. Basha një pyetje që lind natyrshëm, ndoshta edhe kuriozitet. Nëse do të ishte një prej kushteve të Bashkimit Europian një marrëveshje për të zgjidhur krizën, do të arrinte ta hidhte si hap Partia Demokratike?

Lulzim Basha: Nuk ka dyshim që zgjidhja e krizës kërkon vetëdijësim të të dyja palëve. Dhe kjo është arsyeja pse PD dhe opozita e bashkuar kanë hedhur një hap aktiv që nuk na takonte ne, i takonte qeverisë, se ajo është shkaktarja e krizës, i takonte kryeministrit, se ai është shkaktari për dështimin e katërt për moshapjen e negociatave. Por ne nuk mund të lëmë vendin, as shqiptarët peng të një njeriu që premton, dështon dhe pastaj mashtron dhe mundohet ta hedhë fajin diku tjetër. Prandaj kemi hedhur këtë hap, kemi këtë plan për daljen nga kriza që mishërohet edhe me 9 kushtet e Bundestagut. Kemi një propozim për reformën zgjedhore dhe tani është koha që t’i lëmë llafet dhe të fokusohemi jo për hir të partive tona apo për hir të karrigeve tona, por për hir të Shqipërisë, të vendosim Shqipërinë të parën, të vendosim shqiptarët të parët dhe t’i hapim rrugë zgjidhjes së krizës politike me zgjedhje të parakohshme parlamentare dhe vendore në të njëjtën kohë.

Pyetje: Si do ta vlerësonit reformën në drejtësi z.Basha dhe kush duhet të ketë frikë nga SPAK dhe nga Byroja Kombëtare e Hetimit?

Lulzim Basha: Reforma në drejtësi ishte reforma që nisi me qëllimet më të mira. Drafti që u miratua mbrëmbjen e 22 korrikut është krenari për Partinë Demokratike dhe për mua personalisht. Mund të them që shpenzuam dhe luftuam një kohë të gjatë që të arrinim se drafti kushtetues të mishëronte parimet e drejtësisë europiane. Zbatimi i kësaj reforme nisi me shtrembërime, kapje, tentativa për kapje.Megjithatë unë kam besim se në bashkëpunim me faktorin ndërkombëtar ne do të arrijmë që t’ia dalim që reformën në drejtësi ta kthejmë në histori suksesi.  Deri më sot askush nuk është dënuar. Gjyqi i Saimir Tahirit është farsa që tregon se çfarë rreziku i kanoset dështimit të reformës në drejtësi nga një pushtet i cili është i tmerruar nga reforma në drejtësi dhe më të drejtë. Por ne do të insistojmë, do të mbështesim ngritjen e SPAK-ut, sipas Kushtetutës. Mbështetjen e SPAK-ut me burime të mjaftueshme njerëzore dhe buxhetore dhe hetimin një më një të të gjithë akuzave për korrupsion të çdo politikani, pavarësisht ngjyrave politike, pavarësissht se në çfarë periudhe bëhet fjalë dhe të lidhjeve të politikës me krimin. Kjo është rruga për ta çuar Shqipërinë drejt Europës dhe për t’i dhënë shqiptarëve atë që meritojnë: barazi para ligjit.

Pyetje: Z. Basha ne po arrijmë drejt fundit të intervsitës. Nesër janë zgjedhjet në Kosovë, a keni ju një preferencë?

Lulzim Basha: Unë ju uroj qytetarëve të Kosovës që nesër të kenë një festë të demokracisë, të zgjedhin alternativën më të mirë, të votojnë për konsolidimin e shtetit të Kosovës, të votojnë për Kosovën e vlerave euroiane, për Kosovën që lufton krimin dhe korrupsionin, për Kosovën e shpresave dhe qëllimeve të brezit të ri, të të rinjve dhe të rejave të Kosovës që janë burim frymëzimi dhe janë edhe burimi i energjisë për një Kosovë europiane, krah për krah një Shqipërie europiane në mënyrë që të lëmë pas periudhën e ngarkuar me kriza, të ngarkuar me korrupsion, të ngarkuar me humbje shprese. Të rikthejmë shpresën sepse nuk na mungon asgjë. Na ka munguar vetëm vullneti për të ecur përpara, na ka munguar vullneti për të vendosur qytetarët tanë të parët. Jam i bindur se qytetarët e Kosovës nesër do të vijnë të zgjedhin për ata që i vënë qytetarët e Kosovës të parët dhe jo vetën e tyre apo pushtetin e tyre.

Pyetje: Ju vetë keni një preferencë?

Lulzim Basha: Padyshim që po, por edhe më shumë nga pozitat e kryetarit të Partisë Demokratike nuk mund ta shpreh, as dëshiroj ta shpreh, sepse kjo do të përbënte një ndikim në procesin elektoral në Kosovë. Dhe unë besoj se i takon qytetarëve të Kosovës që të vendosin me votën e tyre të cilën PD dhe unë personalisht e respektoj, siç e kam respektuar gjithmonë.

Pyetje: Dhe në fund fare, z.Basha përtej gjithë intervistës që zhvilluam bashkë, duke përfituar edhe nga rasti që po realizojmë këtë bisedë të gjatë. Ju flisni gjithmonë politikisht por një periudhë shumë intensive për Partinë Demokratike, për ju personalisht, duke nisur që nga 26 shkurti i famshëm, si është një ditë për ju z.Basha nga mëngjesi deri në darkë, për nga pjesa e intensitetit dhe si i përjetoni ju sulmet ndaj jush, të të gjitha formave që janë zhvilluar deri tani?

Lulzim Basha: Dita është shumë intensive. Mendoj se do të ishte e kotë të përpiqesha në minutazhin që na ka mbetur të të jepja një përshtypje. Ditët janë të ngarkuara, kjo është padyshim ngarkesa apo edhe përgjegjësia që kam marrë përsipër. Sa i përket qëndrimeve që mbahen ndaj meje ka nga ato që kanë për qëllim thjesht dhe vetëm të detraktojnë, pra të më heqin fokusin nga përgjegjësitë e mia karshi qytetarëve shqiptarë dhe interesit të qytetarëve shqiptarë, ka nga ato që meritojnë vëmendje, pavarësisht se mund të shprehen në mënyra jo fort të pëlqyeshme nga unë. Përpiqem që këtyre të dytave t’u kushtoj vëmendjen e duhur, sepse një politikan që nuk reflekton përbën një rrezik të madh për vendin, partinë dhe veten e tij.

Pyetje: A ka një emër konkret që ju ka bërë të reflektoni?

Lulzim Basha: Ka shumë dhe unë reflektoj edhe nga kritika që vijnë nga kundërshtarë të hapur dhe të pandryshueshëm të mi.

Pyetje: Po nga vetë forca juaj politike?

Lulzim Basha: Padyshim!

Pyetje: Z.Basha po për familjen sa kohë keni për t’iu përkushtuar?

Lulzim Basha: Fatkeqësisht shumë më pak sesa duhet.

Pyetje: Unë ju falënderoj shumë për këtë intervistë që realizuam bashkë. Faleminderit që ishit në “Kjo Javë”!

Lulizm Basha: Faleminderit ju!

Lajme te ngjashme

error: Alert: Content is protected !!